ಪಯಣ

ಮನದ ಹಿಮ್ಮೇಳದಲಿ ಜಣಜಣದ ಝೇಂಕಾರ
ಹಳೆಮನೆಯ ಕೊಳಕು ಹೊಸಮನೆಯ ಥಳುಕು
ಭಿತ್ತಿಯಲಿ ಸರಿಯುತಿದೆ ಬವಣೆಗಳ ನೆನಪು
ಸೋರುವ ಮನೆಯಲ್ಲಿ ಸೋರಿಹೋದ ಬದುಕು
ನಿರೀಕ್ಷೆಯ ಮುಗಿಲ ದಾರಿಯಲಿ ಬಾಗಿ ಬಿಲ್ಲಾಗಿ
ಬದುಕು ಭಾರದ ಎಡೆಯಿಂದ ಲಾರಿ ಬೆನ್ನಿಗೆ ಸಾಗಿ
ನಾಗಾಲೋಟದ ವೇಗ ಕತ್ತೆ ದಾರಿಯ ಹಿಡಿದು
ಹಸಿರು ಮಕಮಲ್ಲಿನ ನಡೆಮಡಿಯ ಹಾದಿಯಲಿ
ಪಯಣ ನಡೆದಿದೆ ಹೊಸ ಬದುಕಿನೆಡೆಗೆ
ಮರಿಕುರಿಗಳ ಬಾಲ ಧೃವತಾರೆಯಾಗಿ
ಹೊಸಹೊಸ ಹಾದಿ ಹರಿದತ್ತ ಬೀದಿ
ಇದ್ದವನಿಗೆ ಒಂದುಮನೆ
ಇಲ್ಲದವನಿಗೋ ನೂರುಮನೆ
ಆ ಮನೆ ಈ ಮನೆ ಎಲ್ಲ ಸುಕಾಸುಮ್ಮನೆ
ಬದುಕು ಸಾಗಿದೆ ಬೆಚ್ಚನೆಯ ಮನೆಯೆಡೆಗೆ
ಹಸಿವಿರದ ಹೆಸರಿರದ ಸೌಖ್ಯದಾರಾಮದೆಡೆಗೆ

ಪರಿಶುದ್ಧತೆ

ನನ್ನ ಬಾಳಿನ ಜೀವವೇ,

ನನ್ನ ಅಂಗಾಂಗಳ ಮೇಲೆ ನಿನ್ನ ಜೀವಸ್ಪರ್ಶ ಇರುವುದರಿಂದ,

ನನ್ನ ದೇಹವ ಪವಿತ್ರವಾಗಿಟ್ಟುಕೊಳ್ಳಲು ಸದಾ ಯತ್ನಿಸುವೆ

ನನ್ನ ಮನದೊಳಗಿನ ಕಾರಣದೀಪ ಬೆಳಗಿದ ಸತ್ಯ ನೀನಾದ್ದರಿಂದ,

ನನ್ನ ಚಿಂತನೆಗಳಿಂದ ಎಲ್ಲ ಸುಳ್ಳುಗಳನ್ನೂ ಹೊರಗಿಡಲೆತ್ನಿಸುವೆ

ನನ್ನ ಹೃದಯದೊಳಗಿನ ಕೆಡುಕುಗಳೆಲ್ಲ ತೊಲಗಲಿ, ಕುಸುಮದ ಮೇಲೆನ್ನ ಪ್ರೀತಿಯಿರಲಿ,

ಏಕೆಂದರೆ ನನ್ನ ಹೃದಯಾಂತರಂಗದ ಗುಡಿಯಲ್ಲಿ ನೀನಿರುವೆ

ನನ್ನ ಕ್ರಿಯೆಗಳಲ್ಲಿ ನಿನ್ನನ್ನು ತೋರುವ ಕಾಯಕ ನನಗಿರಲಿ, ನನ್ನ ದೃಢ ನಡೆಯ ಹಿಂದೆ ನಿನ್ನ ಶಕ್ತಿಯಿದೆ.

(ರವೀಂದ್ರನಾಥ ಟಾಗೋರರ ಕವಿತೆಯ ಅನುವಾದ)

Purity

Life of my life, I shall ever try to keep my body pure, knowing that thy living touch is upon all my limbs.

I shall ever try to keep all untruths out from my thoughts, knowing that thou art that truth which has kindled the light of reason in my mind.

I shall ever try to drive all evils away from my heart and keep my love in flower, knowing that thou hast thy seat in the inmost shrine of my heart.

And it shall be my endeavour to reveal thee in my actions, knowing it is thy power gives me strength to act.