ಪಯಣ

ಮನದ ಹಿಮ್ಮೇಳದಲಿ ಜಣಜಣದ ಝೇಂಕಾರ
ಹಳೆಮನೆಯ ಕೊಳಕು ಹೊಸಮನೆಯ ಥಳುಕು
ಭಿತ್ತಿಯಲಿ ಸರಿಯುತಿದೆ ಬವಣೆಗಳ ನೆನಪು
ಸೋರುವ ಮನೆಯಲ್ಲಿ ಸೋರಿಹೋದ ಬದುಕು
ನಿರೀಕ್ಷೆಯ ಮುಗಿಲ ದಾರಿಯಲಿ ಬಾಗಿ ಬಿಲ್ಲಾಗಿ
ಬದುಕು ಭಾರದ ಎಡೆಯಿಂದ ಲಾರಿ ಬೆನ್ನಿಗೆ ಸಾಗಿ
ನಾಗಾಲೋಟದ ವೇಗ ಕತ್ತೆ ದಾರಿಯ ಹಿಡಿದು
ಹಸಿರು ಮಕಮಲ್ಲಿನ ನಡೆಮಡಿಯ ಹಾದಿಯಲಿ
ಪಯಣ ನಡೆದಿದೆ ಹೊಸ ಬದುಕಿನೆಡೆಗೆ
ಮರಿಕುರಿಗಳ ಬಾಲ ಧೃವತಾರೆಯಾಗಿ
ಹೊಸಹೊಸ ಹಾದಿ ಹರಿದತ್ತ ಬೀದಿ
ಇದ್ದವನಿಗೆ ಒಂದುಮನೆ
ಇಲ್ಲದವನಿಗೋ ನೂರುಮನೆ
ಆ ಮನೆ ಈ ಮನೆ ಎಲ್ಲ ಸುಕಾಸುಮ್ಮನೆ
ಬದುಕು ಸಾಗಿದೆ ಬೆಚ್ಚನೆಯ ಮನೆಯೆಡೆಗೆ
ಹಸಿವಿರದ ಹೆಸರಿರದ ಸೌಖ್ಯದಾರಾಮದೆಡೆಗೆ